سؤال لكا شخص فى المنتدى عن موضوع الصور يا ريت الكل يخشوا هاااااام

يا ترى حاطط صورة مين في أوضتك ؟!

أوضتك هي عالمك الخاص .. صومعتك .. الخن بتاعك ، حتى لو أخواتك معاك في الأوضة .. برضه هتعمل عليهم رأس كبيرة و تشتغلهم و تخليهم يلتزموا بطقوس معينة .. شبابيك مقفولة .. جو معتم " حتى لا يطير الدخان " .. و صورة على الحيطة .. فيه ناس بتعمل معرض صور في أوضتها .. صور فنانين .. مطربين .. مناظر طبيعية .. و اللي بتحب تنام و تصحى على وشوشهم ، أو عايز تبقى زيهم أو بنات حلوة عايز تصاحبها أو نجم أمور كده نفسك تبقى في حلاوته لو ولد ، و لو بنت تبقي عايزة تبقي بطلة أفلامه و حياته و أم عياله كمان .. يا ترى كل واحد منكم معلق صورة إيه أو مين على حيطة أوضته .. لأن ده مؤشر على مستوى تفكيرك و دماغك اللاسعة أو المعقدة أو الكآبة أو عايش في الدور .. وقفت عند بتاع بوسترات في وسط البلد فارش الرصيف كله صور أهمها نانسي في جلبيتها الشهيرة اللي خلت كل ستات مصر يعيدوا تفكيرهم في موضوع الجلبية .. بس لو عملوا إيه .. مش أي حد يا جماعة .. المهم كان فيه صورة كمان لفريق ريال مدريد و أحمد عز – يا عيني يا بنات بقى – و تامر حسني و فريق بول و إمينيم – مش عارف أكتبها عربي – خدوها إنجليزي – Eminem اللي كانت بوستره بـ 100 ج لأنه ببرواز زي ما قالت لي واحدة مجنونة باسمه ده Eminem و فريق الأهلي .. و ناس تانية كتير و سألت البياع أكتر حاجة الشباب بيشتروها قاللي : و الله بتاخد نجوم الكورة و الفنانات الحلوة إليسا و نانسي ، و البنات بيحبوا الممثلين الأجانب زي براد بيت أو نجوم مسلسل فريندس ..
يعني الصبيان زي القرع يمدوا لبره و إحنا كمان برضه زي القرع هما-الصبيان- بيبصوا لبتوع لبنان ، و إحنا – البنات – يعني بنحب بتوع أمريكا .. نسأل بقى الشباب :
دعاء عمرو – إعلام : أنا فوق سريري بالظبط صورة أحمد عز و على المكتب ريال مدريد و جيفارا و عبد الناصر .. و دول هما حالات نفسية عندي بأحب أعيشها أو أبقى زيها في يوم من الأيام ، يعني عايزة تبقي ثورجية أو تلعبي كورة ؟ إزاي يعني ؟
عندنا حالة تانية ، قصدي محمد عبد الستار – حقوق .. ( أنا حاطط في أوضتي صورة واحدة بس صورة الكعبة مرسومة بألوان مائية و شكلها خطير .. كنت معلق صور قبل كده على الحيطة أنا و أخويا بس شيلتهم أو بمعنى أصح قطعتهم عشان حرام و علقت صورة الكعبة ) ربنا يهدينا جميعاً .
في بنوتة بقى أول ما سألتها انفجرت فيا : ( عمرو دياب طبعاً أنا مجمعة له صور كتير على السرير و على المكتب و استيكرز حاطاها على ملفاتي و كتبي و كل ما أسمع له أغنية لازم أعلي التسجيل أو الراديو على الآخر .. أصلي بحبه قوي .. أي حاجة يعملها أنا مجنونة بيها و بيه )
على إبراهيم : ( هيفاء وهبي كنت جايب لها صورة جامدة قوي بس قطعتها .. الخاينة راحت اتجوزت .. طبعاً أنا بأهزر يا جماعة قال يعني كنت هاتجوزها أصلاً ! لأ لسه محتفظ بالصورة و ساعات أقعد مربع على السرير أتفرج عليها و أي كليب بيجي لها لازم أتنح قدامه و اسبهل ) هي كل الصبيان بتحب بتوع لبنان ليه ؟ إدونا أمل في نفسنا شوية .
هدى محمود . آداب : ( توم كروز و انريك اجلاسيوس و قدوتي بقى روبي .. أصل أنا سمرة زيها ) ده طلع إن البنات كمان بتحب النوعيات دي .. و قدوة إيه اللي في روبي .. ربنا يكسفك .
( نانسي يا خرابي عليها و هي بالجلبية بتاعتها دي إوعى ) ده عبد الله زاهر مجنون نانسي و يكمل : ( الجلبية دي أساساً مصرية و المفروض إن أي بنت مصرية تبقى جميلة فيها بس أول مرة ألاقي حد تاني حلو فيها و مش هالاقي .. أنا حاططها قدامي على المكتب – مش هتفلح إن شاء الله – و حاطط صورة ريال مدريد فريق النجوم الكبار كله .. ) أنا كبنت لازم أدافع عن بنات مصر و ألفت النظر إن الجلابية أصلاً متضيقة و متجسمة على نانسي و الفتحتين من الجنب كل ده عامل لها شغل يا شباب

موضوع جامد تسلم ايديك واكيد انا حاطه سامو وعمرو وتامر لاني بموت فيهم

» سؤال لكل شخص فى المنتدى؟؟؟ ؟؟؟؟؟
» هااااام جدا كلام الشاب للبنت الكل يخش فورا!!!!
» عمرها حصلتلك ديه !!!
» ارجوكم اتركوا المنتدى فورااااا !!!!